وسط جولائی میں اسرائیلی فوج کی جانب سے مسجد اقصیٰ میں نماز پرپابندی کے ظالمانہ فیصلے کے رد عمل میں فلسطینی اتھارٹی نے صہیونی ریاست کے ساتھ کئی سال سے جاری سیکیورٹی تعاون غیرمعینہ مدت تک ختم کرنے کا اعلان کیا تھا مگر اب پتا چلا ہے کہ فلسطینی اتھارٹی کا یہ دعویٰ قوم کی آنکھوں میں دھول جھونکنے کی ایک مجرمانہ کوشش کی تھی، کیونکہ رام اللہ اتھارٹی کے سیکیورٹی ادارے در پردہ اب بھی صہیونی فوج کے ساتھ رابطے میں ہیں۔ حتیٰ کہ اسرائیل کی فوجی تقریبات میں عباس ملیشیا کے عہدیدار شرکت بھی کرتے ہیں۔
مرکزاطلاعات فلسطین کے نامہ نگار کے مطابق حال ہی میں غرب اردن میں اسرائیلی فوج کے ایک سینیر افسر کی ریٹائرمنٹ کے بعد اس کے اعزاز میں منعقدہ الوداعی پارٹی میں فلسطینی ملیشیا کے عہدیداروں کے ساتھ ساتھ جنین شہر کے چیمبر آف کامرس کے تین تاجر نمائندوں نے بھی شرکت کی۔
یہ تقریب غرب اردن میں منعقد کی گئی تھی۔ اسرائیلی فوجی افسر کی الوداعی تقریب میں اسرائیلی ملٹری رابطہ کار سمیر کیوف اور دیگر سینیر فوجی افسران نے شرکت کی۔
اس موقع پر فلسطینی اتھارٹی کی طرف سے بھی مقرر کردہ رابطہ کار نے تقریب سے خطاب کیا۔ اسرائیلی حکام نے اپنی تقاریری میں فلسطینی اتھارٹی کے سیکیورٹی اداروں کی طرف سے ملنے والے تعاون کی تعریف کی اور کہا کہ فلسطینی حکام کا اسرائیلی فوج اور قانون نافذ کرنے والے اداروں کے ساتھ بھرپور تعاون اب بھی جاری ہے۔
فلسطینی اتھارٹی کے مندوبین کی اسرائیلی فوجی افسر کی الوداعی تقریب مین شرکت کا انکشاف ایک ایسے وقت میں ہوا ہے جب دوسری طرف صدر محمود عباس اسرائیل کے ساتھ تعلقات کی کشیدگی اور سیکیورٹی کے امور میں عدم تعاون کا دعویٰ کرتے ہیں۔
