ترکی کی جانب سے ماہ صیام میں غزہ کی پٹی کے محصورین کے لیے بھیجے گئے امدادی سامان کا ایک بحری جہاز گذشتہ دنوں اسرائیل کی اسدود بندرگاہ پر اترا جس پر لادا گیا امدادی سامان پانچ ٹرکوں کے ذریعے غزہ منتقل کردیا گیا ہے۔
مرکزاطلاعات فلسطین کے مطابق فلسطینی گذرگاہ امور کے ڈائریکٹر وائل ابو عمر نے بتایا کہ ترکی سے لائے گئے امدادی سامان کے 14 میں سے پانچ ٹرکوں کا امدادی سامان کرم ابو سالم گذرگاہ کے راستے غزہ کو بھیج دیا گیا ہے۔
خیال رہے کہ حال ہی میں ترکی سے بھیجا گیا امدادی بحری جہاز اسدود بندرگاہ پر لنگر انداز ہوا۔ ترک امدادی جہاز جنوبی ترکی کی مرسین بندرگاہ سے چالیس گھنٹےکی مسافت طے کرکے اسدود پہنچا۔
’اکوا اسٹیلا‘ نامی اس بحری جہاز پر 50 ہزار ملبوسات، اسکول کے بچوں کی 20 ہزار کاپیاں، 18 ہزار کھلونے اور 50 ہزار خوراک کے پیکٹ، سائیکلیں، پانچ ہزار ٹن آٹا، ایک سو ٹن بسکٹ چاکلیٹس، کیک، عید کےکپڑے اور 100 وہیل چیئرز شامل ہیں۔
