فلسطینی اتھارٹی اور تحریک فتح کے سربراہ محمود عباس نے اپنی ہی جماعت کے کئی سرکردہ رہنماؤں کو پارٹی سے نکالنے کی منظوری دی ہے۔
مرکزاطلاعات فلسطین کے مطابق پیپلز آرگنائزیشن ہائی کمیشن کی طرف سے جاری کردہ ایک بیان میں بتایا گیا ہے کہ صدر عباس نے اپنی جماعت فتح کے تین رہ نما فواد شبطیہ، موسیٰ الصیاد اور عماد عواد کو پارٹی سے نکالنے کی منظوری دی ہے۔
بیان میں بتایا گیا ہے کہ تینوں رہ نماؤں کی فتح کی رکنیت کی منسوخی کی وجہ ان ارکان پر پارٹی کے لائحہ عمل اورتنظیمی ذمہ داریوں کی عدم ادائیگی کا الزام عاید کیا گیا ہے۔
پیشے کے اعتبار سے یہ تینوں رہ نما وکیل ہیں۔ انہوں نے حالیہ لائرز یونین انتخابات میں پارٹی ضوابط کے برخلاف خود کو امیدوار قرار دیا تھا۔
اسی طرح صدر عباس نے تحریک فتح کے ادب وکتاب شعبے کے رکن عزت غزاوی کی رکنیت بھی معطل کردی ہے۔
خیال رہے کہ گذشتہ برس فلسطینی صدر نے ایک متنازع صدارتی فرمان کے تحت اپنی ہی پارٹی کے پانچ منتخب ارکان کا پارلیمانی تحفظ ختم کردیا تھا۔ اس سے قبل ان پانچوں کی پارٹی رکنیت بھی ختم کر دی تھی۔
