فلسطین کے مقبوضہ بیت المقدس شہر میں نامعلوم افراد نے اسرائیلی فوجیوں پر فائرنگ کی جس کے نتیجے میں کم سے کم چار فوجی اہلکار زخمی ہوگئے۔
مرکزاطلاعات فلسطین کے مطابق فائرنگ کا یہ واقعہ تل الفرنسیہ کالونی میں شمعون ھزودیک اسٹیشن کے قریب پیش آیا۔ زخمی ہونے والے چاروں اسرائیلی فوجیوں کو علاج کے لیے ایمبولینسوں کی مدد سے اسپتال لے جایا گیا ہے۔
عبرانی اخبار ’یدیعوت احرونوت‘ کی ویب سائیٹ پر پوسٹ ایک بیان میں کہا گیاہے کہ فائرنگ کے نتیجے میں چار فوجی اور متعدد یہودی آباد کار زخمی ہوئے ہیں۔ ایک زخمی فوجی کی حالت تشویشناک ہے۔
حملہ آور کے بارے میں تفصیلات سامنے نہیں آسکی ہیں تاہم متضاد اطلاعات میں بتایا گیا ہے کہ ایک حملہ آور بھی زخمی ہے۔ بعض دوسرے ذرائع کہتے ہیں کہ حملہ آور فائرنگ کے بعد فرار ہوگیا تھا۔ پولیس نے تل الفرنسیہ کو گھیرے میں لے کر تلاشی شروع کردی ہے۔
