اسرائیلی جیلوں میں قید اسلامی تحریک مزاحمت ’حماس‘ کے اسیران نے آج جمعرات سے صہیونی انتظامیہ کے ناروا رویے اور فوج کی جانب سے قیدیوں کی توہین آمیز تفتیش اور ان کی ایک سے دوسری جیل میں ظالمانہ طریقے سے منتقلی کے خلاف بہ طور احتجاج بھوک ہڑتال شروع کی ہے۔
مرکزاطلاعات فلسطین کے مطابق حماس کے شعبہ امور اسیران کی جانب سے جاری کردہ بیان میں بتایا گیا ہے کہ اسرائیل کی ’ایچل‘ جیل میں قید حماس کے 135 اسیران نے آج جمعرات کو غیرمعینہ مدت کے لیے بھوک ہڑتال کا اعلان کیا ہے۔
بیان میں کہا گیا ہے کہ ’باعزت بھوک ہڑتال 2‘ کے نام سے یہ مہم اسیران نے صہیونی جیل انتظامیہ اور فوجی تفتیش کاروں کے ناروا رویے کے خلاف شروع کی ہے۔ اسیران نے حال ہی میں قیدیوں کو ایک سے دوسری جیل میں ظالمانہ طریقے سے منتقل کیے جانے کے خلاف احتجاج کرنے اور احتجاجا بھوک ہڑتال کرنے کا اعلان کیا تھا۔
حماس کا کہنا ہے کہ جماعت سے وابستہ اسیران نے فیصلہ کیاہے کہ وہ بھوک ہڑتال کا دائرہ تمام جیلوں میں پھیلائیں گے۔ بیان میں کہا گیا ہے کہ صہیونی جیلوں میں انتظامی قید کے باعث احتجاج بھوک ہڑتال کرنے والے اسیران محمود عیسیٰ، جمال ابو الھیجاء، جمال الھور، عثمان بلال، بلال البرغوثی اور مصطفیٰ الاسطل تمام حماس کے اسیران ہیں جنہوں نے پہلے ہی بھوک ہڑتال شروع کر رکھی ہے۔
