اسرائیلی حکام نے سوشل سرگرمیوں کے دوران فلسطینیوں کی حمایت کی مہمات چلانے کی پاداش میں گرفتار کی گئی تین فلسطینی خواتین کارکنوں کو رہا کردیا ہے۔ تینوں کو چند ہفتے قبل سماجی رابطے کی ویب سائیٹ’فیس بک‘ پر فلسطینیوں کی حمایت اور اسرائیل کے خلاف مواد پوسٹ کرنے کے الزام میں گرفتار کرکے جیلوں میں ڈالا گیا تھا۔
رام اللہ کے مقامی فلسطینی ذرائع کا کہنا ہے کہ رہائی پانے والی خواتین سماجی کارکنوں میں جنوبی بیت لحم کے الخضر قصبے کی رہائشی مجد عطوان کو 19 اپریل کو گرفتار کیا گیا تھا۔ اسے ڈیڑھ ماہ قید کے ساتھ ساتھ تین ہزار شیکل جرمانہ بھی کیا گیا۔ اس کے علاوہ جنین کی رہائشی وفاء البدوی اور ایناس ابوھلال کو مشرقی بیت المقدس کے ابو دیس قصبے سے دو ماہ قبل گرفتار کیا گیا، انہیں دو ماہ قید کے ساتھ جرمانے کی سزائیں سنائی گئی تھیں۔
خیال رہے کہ اسرائیلی حکام کی جانب سے پچھلے سات ماہ کے دوران اٹھائیس سماجی کارکنوں کو حراست میں لیا گیا اور انہیں قید وبند اور جرمانوں کی سزائیں سنائی گئیں۔
