فلسطین میں نکبہ کی 68 ویں برسی کے موقع پر ایران میں دفاع قبلہ اول کانفرنس کا انعقاد کیا گیا۔ کانفرنس میں اسلامی تحریک مزاحمت ’’حماس‘‘ کے مندوبین نے بھی شرکت کی۔
مرکزاطلاعات فلسطین کے نامہ نگار کے مطابق ’’ہم سب اقصیٰ کے ساتھ ہیں‘‘ کے عنوان سے منعقدہ کانفرنس فلسطینی حقوق کی پرچارک ڈاکٹر زھراء مصطفوی کی زیرصدارت منعقد ہوئی۔ کانفرنس میں فلسطینیوں کے حقوق کی حمایت کرنے والے سیکڑوں عالمی مندوبین بھی شرکت کی۔
تہران میں منعقدہ دفاع اقصیٰ کانفرنس میں ایرانی حکومت کے سرکردہ عہدیداروں کے علاوہ حماس کے ایران میں مندوب ڈاکٹر خالد القدومی، لبنانی حزب اللہ کے مندوب، یورپ، بھارت، ایشیا اور افریقی ملکوں سے تعلق رکھنے والے سماجی او انسانی حقوق کارکنوں نے بھی شرکت کی۔
کانفرنس میں فلسطین میں اسرائیل کے منظم ریاستی جرائم کی شدید مذمت کرتے ہوئے عالمی برادری سے فلسطینیوں کے تحفظ اور دفاع کا مطالبہ کیا۔ مقررین نے کہا کہ مسجد اقصیٰ اور فلسطین پوری مسلم امہ کے مرکزی اور فوری حل طلب مسائل میں سے ایک ہے اور تمام مسالک فلسطینیوں کے حقوق کی حمایت اور قبلہ اول کی آزادی کے مطالبے سے متفق ہیں۔ مقررین نے اسرائیل کے ساتھ دوستانہ مراسم اور تعلقات کے قیام کی بھی شدید مذمت کی اور مسلمان ملکوں پر زور دیا کہ وہ اسرائیل کے حوالے سے متفقہ پالیسی اختیار کریں۔
