یورپی یونین کے اعلیٰ سفارت کار نے کہا ہے کہ اسرائیل کے انتہائی دائیں بازو کے قومی سلامتی کے وزیر کی طرف سے غزہ کی امداد بند کرنے کے مطالبے کے جواب میں انہیں پابندیوں پر غور کرنا چاہیے۔
سوشل میڈیا پلیٹ فارم ایکس پر ایک پوسٹ میں یورپی یونین کی خارجہ پالیسی کے سربراہ جوزپ بوریل نے کہا کہ ایتمار بن گویر کے حالیہ ریمارکس "جنگی جرائم کے لیے اشتعال دلانے” کے مترادف ہیں۔ انہوں نے مزید کہا کہ "پابندیاں ہمارے یورپی یونین کے ایجنڈے پر ہونی چاہئیں۔”
ایکس پر اپنی پوسٹ میں اور میڈیا انٹرویوز میں بین گویر نے کہا، ممکنہ جنگ بندی کے معاہدے پر رضامند ہونے کے بجائے اسرائیل کو غزہ میں انسانی امداد اور ایندھن کا داخلہ اس وقت تک کے لیے روک دینا چاہیے جب تک حماس تمام مغویوں کو رہا نہ کر دے۔ انہوں نے مزید کہا کہ اس طرح گروپ گھٹنے ٹیک دے گا۔
بین گویر نے اسرائیل سے غزہ پر مستقل طور پر دوبارہ قبضہ کرنے، وہاں یہودی بستیوں کی تعمیرِ نو اور فلسطینیوں کی علاقے سے "رضاکارانہ” ہجرت کی حوصلہ افزائی کرنے کا بھی بارہا مطالبہ کیا ہے۔
وزیرِ اعظم بینجمن نیتن یاہو کے گورننگ اتحاد کے ایک اہم رکن بین گویر نے دھمکی دی ہے کہ اگر جنگ بندی کے مذاکرات میں بہت زیادہ رعایتیں دی گئیں تو وہ حکومت گرا دیں گے۔
بوریل نے اسرائیل کی حکومت سے مطالبہ کیا کہ وہ "جنگی جرائم کے ارتکاب کے لیے ان اشتعال انگیزیوں سے واضح طور پر خود کو دور کرے” اور "نیک جذبے سے” امریکہ، قطر اور مصر کی ثالثی میں جنگ بندی کے مذاکرات کے ساتھ شامل ہو۔
امریکہ اور اسرائیل کے دیگر مغربی اتحادیوں نے بارہا فلسطینی شہریوں کی ہلاکت اور 10 ماہ پرانی جنگ میں امدادی کارروائیوں پر اسرائیلی پابندیوں پر تشویش کا اظہار کیا ہے۔ لیکن وہ اس کی جارحیت کے لیے اہم فوجی اور سفارتی مدد فراہم کرتے رہتے ہیں۔
