کینسر کے مرض میں مبتلا قیدی نصیر ابو حامد سے اظہارِ یکجہتی میں دیگر فلسطینی قیدیوں نے بھوک ہڑتال کر دی ہے۔
دورانِ قید علاج کی ناکافی سہولیات اور صحت سے متعلق مستقل عدم توجہی پر یہ قدم گذرے بُدھ سےاٹھایا گیا ہے۔
قیدیوں کی مشکلات پر آواز بلند کرنے والی اتھارٹی نے جمعرات کو ایک بیان جاری کیا جس میں کہا گیا ہے کہ تمام قیدی تین دن تک نہ کچھ کھائیں گے نہ پئیں گے۔
اسرائیل نے قیدیوں پر ظلم کی انتہا کر دی ہے۔ مریضوں کو علاج کی بنیادی سہولت سے محروم رکھنا اب معمول ہے۔ بھوک ہڑتال خوابیدہ عالمی ضمیر کو جگانے کی ایک کوشش ہو گی۔ طبی سہولیات فراہم نہ کرنے پر اسرائیل کی مذمت جاری رکھنے کا عزم کیا گیا ہے۔
وکیل کریم اجوہ نے رام اللہ قید خانے میں ابو حامد سے ملاقات کی۔ وہ اُن کی بگڑتی صحت پر شکوہ کناں تھے۔ ابو حامد کے لیے چلنا پھرنا تقریباً ناممکن ہے۔ ذہن بری طرح متاثر ہوا اور وزن تیزی سے کم ہو رہا ہے۔
وکیل کے مطابق انہیں صرف درد کش ادویات دی جا رہی ہیں، باقاعدہ کوئی علاج نہیں کیا جا رہا۔ 2002ء سے قید کی صعوبت اٹھاتے ابو حامد اسلاف کی یاد ہیں۔
