فلسطینی قانون ساز اسمبلی کے قائم مقام سپیکر ڈاکٹر احمد بحر نے نئے فلسطینی صدارتی آرڈیننس کو غیر آئینی قرار دیتے ہوئے مسترد کردیا ہے- انہوں نے کہا کہ محمود عباس کی جانب سے پارلیمنٹ کے طریقہ انتخابات میں تبدیلی غیر آئینی ہے- صدارتی آرڈیننس آئین کے خلاف انقلاب ہے- واضح رہے کہ محمود عباس نے قانون ساز اسمبلی کے طریقہ انتخابات میں تبدیلی کرتے ہوئے آئندہ انتخابات متناسب نمائندگی کی بنیاد پر کرانے کا آرڈیننس جاری کیا ہے – گزشتہ انتخابات حلقہ جات کی بنیاد پر منعقد کیے گئے اور ان انتخابات میں اسلامی تحریک مزاحمت (حماس) نے دو تہائی اکثریت حاصل کی تھی- محمود عباس نے حماس کی حکومت کو دو ماہ قبل تحلیل کردیا تھا-
ڈاکٹر احمد بحر نے کہا ہے کہ نئے صدارتی آرڈیننس کے متعلق قانونی لحاظ سے پارلیمنٹ کا مؤقف اور صدارتی آرڈیننس کے منفی اثرات کی تفصیل کل پریس کانفرنس میں واضح کی جائے گی-
