امریکہ میں فلسطینی جماعتوں کا اناپولیس کانفرنس میں شرکت کا بائیکاٹ

امریکہ میں فلسطینیوں کی نمائندہ جماعتوں نے امریکی صدر جارج بش کی دعوت پر بلائی جانے والی کانفرنس میں شرکت سے انکار کردیا ہے- نیویارک میں فلسطینی جماعتوں کے متحدہ محاذ ’’فلسطین پیپلز کانفرنس‘‘ کے چوتھے سالانہ اجتماع میں ملک بھر سے پچاس سے زائد فلسطینی نمائندہ شخصیات نے شرکت کی-
کانفرنس کے اختتامی سیشن میں ایک قرارداد پاس کی گئی جس میں اناپولیس شہر میں مشرق وسطی امن کانفرنس میں شرکت نہ کرنے کا مشترکہ فیصلہ کیا گیا- قرارداد میں کہا گیا کہ صدر بش کی دعوت پر بلائی گئی کانفرنس فلسطینی عوام کے حقوق کی ضمانت نہیں دے سکتی بلکہ یہ اسرائیلی جارحیت کو تحفظ فراہم کرنے کی کوشش ہے- اجلاس کے اختتام پر متحدہ محاذ نے نیویارک میں اقوام متحدہ کے دفتر کے سامنے مظاہرہ کیا اور ایک یادداشت بھی پیش کی جس میں عالمی ادارے کی توجہ اسرائیلی جارحیت کی جانب مبذول کرائی گئی-