فلسطینی قانون ساز کونسل کے سیکرٹری ڈاکٹر محمود الرماحی نے کہاہے کہ فلسطینی اتھارٹی اور اسرائیل کے درمیان مذاکرات بے فائدہ ہیں کیونکہ انا پولیس کانفرنس کسی نتیجے پر پہنچے بغیر ختم ہوئی ہے – اسرائیلی عسقلان جیل سے بھیجے جانے والے اپنے بیان میں رماحی نے کہاہے کہ انا پولیس کانفرنس بھی سراب ہے اور سراب کے پیچھے دوڑنے کی ضرورت نہیں ہے- رماحی کو ساتھیوں سمیت اسرائیلی فوجیوں نے سترہ مہینے قبل اغوا کیاتھا اور وہ سترہ مہینوں سے جیل میں ہیں-
انہوں نے کہا کہ اناپولیس کانفرنس کے بارے میں خیال کیا جا رہا ہے کہ اب مذاکرات کے سلسلے کاآغاز ہوجائے گا لیکن یہ مذاکرات کی اندھی دلدل ہے جو فلسطینیوں کو کہیں بھی نہ پہنچائے گی – رماحی نے اپنے خط میں کہاہے کہ اسرائیلی وزیر اعظم نے اپنی تقریر میں یہ بالکل نہیں کہاکہ وہ فلسطینیوں کو ان کے قانونی حقوق دینے کے لئے تیار ہیں – رماحی نے الزام عائد کیا ہے کہ فلسطینی قیادت امریکہ کے وعدوں اور اسرائیل کی تسلیوں پر دھوکے پر دھوکہ کھا رہی ہے –
