غزہ کی کراسنگ کے مسئلہ کے حل کے لیے سعودی عرب کے وزیر خارجہ سعود الفیصل مصر کے دارالحکومت قاھرہ پہنچ گئے ہیں- انہوں نے مصر کے صدر حسنی مبارک اور اپنے مصری ہم منصب احمد ابو الغیظ سے ملاقات کی- ملاقات کے بعد سعود الفیصل نے میڈیا کو کوئی بیان نہیں دیا البتہ ذرائع نے واضح کیا ہے کہ سعود الفیصل کے دورہ مصر کا مقصد غزہ میں کراسنگ کے بحران کے حوالے سے مصری قیادت سے تبادلہ خیال کرنا ہے- سعودی عرب کی کوشش ہے کہ وہ اسلامی تحریک مزاحمت (حماس) اور فتح کے درمیان اختلافات میں متوازن اور غیر جانبدارانہ مؤقف اختیار کرے-
حماس نے بحران کے حل کے لیے سعودی کوششوں کی تعریف کی- حماس کے ترجمان سامی ابوزھری نے کہا کہ فلسطین کے حوالے سے سعودی عرب کا مؤقف متوازن اور ذمہ دارانہ ہے- ریاض فلسطینیوں کے آپس کے اختلافات کے خاتمے کے لیے سنجیدہ ہے-
