امریکہ اسرائیل کے لئے ہر قربانی دے گا

ڈیموکریٹک پارٹی کی صدارتی نامزدگی کے اہم مرحلے پینسلوینیا پرائمری کے موقع پر ہلری کلنٹن نے ایران کو متنبہ کیا ہے۔ہلری کلنٹن نے کہا ہے کہ اگر ایران نے اسرائیل پر جوہری حملہ کیا تو امریکہ ایران پر حملہ کر کے اسے تباہ کر دے گا۔
اگر ایران اسرائیل پر حملہ کر دے تو ان کا ردِ عمل کیا ہو گا، تو ان کا کہنا تھا کہ ’اگر میں صدر ہوں گی تو ہم ایران پر حملہ کر دیں گے۔ ہم ان کو نیست و نابود کر دیں گے۔‘ انہوں نے کہا کہ  بری بات ہے لیکن ایران کو چلانے والوں کو اس بات کو سمجھنا چاہیئے۔ ’ہو سکتا ہے کہ وہ اسی سے ایسی ناعاقبت اندیش، احمقانہ اور المناک حرکت سے باز رہیں۔‘
ان کے مقابلے میں براک اوبامہ نے کہا کہ ایران کو معلوم ہونا چاہیئے کہ اگر امریکہ کے اتحادی پر حملہ کیا تو ہم طاقتور حملہ کریں گے۔‘ گزشتہ کئی ہفتوں سے ہلری کلنٹن امور خارجہ سے متعلق اس نوعیت کے بیانات دیتی آرہی ہیں۔
 بظاہر ان کا مقصد ان کی صدارتی دوڑ میں عوامی حمایت بڑھانا ہے کیونکہ ڈیلیگیٹ کاؤنٹ میں وہ اپنے حریف امیدوار براک اوباما سے پیچھے ہیں۔ پینسلوینیا میں وہ انتخابی جائزوں میں آگے ہیں تاہم مبصرین کے مطابق ان کی امیدوں کا انحصار ایک بڑی کامیابی پر ہے۔ پینسلوینیا آخری بڑی ریاست ہے جس میں پرائمری ہو رہی ہے۔