اسرائیل نے فلسطینی عوام کو ان کے بنیادی حقوق سے محروم کرنے اور صدر محمود عباس کو اپنے جال میں پھنسانے کا ایک نیا وار کیا ہے- اسرائیلی اخبار ’’ھارٹز‘‘ کی رپورٹ میں انکشاف کیا گیا ہے کہ اسرائیلی وزیر اعظم ایہود اولمرٹ نے فلسطینی صدر محمود عباس کو پیشکش کی ہے کہ وہ القدس پناہ گزینوں کے معاملات اور 1967ء کی حدود تک اسرائیل کی واپسی کی رٹ چھوڑ دیں تو اسرائیل غرب اردن کے کچھ علاقے انہیں دینے کو تیار ہے-
رپورٹ کے مطابق اسرائیل فلسطینی ریاست کے لیے مجوزہ غرب اردن کے علاقے سے سات فیصد زمین اپنے قبضے میں رکھے گا جبکہ اس کے متبادل دیگر علاقوں سے زمین فلسطینی اتھارٹی کو دی جائے گی- اولمرٹ کا کہنا ہے کہ وہ وزارت عظمی کے عہدے سے سبکدوشی سے قبل صدر عباس سے اس معاملے کو حتمی شکل دینا چاہتے ہیں-
دوسری جانب اسلامی تحریک مزاحمت (حماس) نے اسرائیلی پیشکش کو قریب کا نیا جال قرار دیا ہے- غزہ میں حماس کے ترجمان ڈاکٹر سامی ابوزھری نے کہا کہ اسرائیل کا یہ منصوبہ فلسطینی عوام کو ان کے دیرینہ حقوق سے محروم کرنے کی طرف ایک قدم ہے- اس طرح کے اقدامات سے اسرائیل اپنے وجود کا جواز تلاش کرنا چاہتا ہے- ترجمان نے کہا کہ فلسطینی عوام مکرو فریب پر مبنی ایسے کسی فارمولے کو تسلیم نہیں کریں گے جس میں ان کے حقوق تلف کیے گئے ہوں-
