اسرائیلی سکیورٹی فورسز نے لبنانی تنظیم حزب اللہ کی جانب سے افریقہ ،ایشیا اور جنوبی امریکا میں اسرائیلی تاجروں کواغوا کرنے کی پانچ سازشوں کو ناکام بنانے کا دعویٰ کیا ہے.
اسرائیلی اخباریدیعوت احرنوت میں منگل کو شائع ہونے والی ایک رپورٹ میں کہا گیا ہے کہ حزب اللہ نے اسرائیلیوں کے اغوا کے لئے دوردرازعلاقوں میں رہنے والی شیعہ کمیونٹیوں میں ”سلیپر سیلز”کو استعمال کرنے کی کوشش کی تھی.
یدیعوت احرنوت اور دوسرے اخبارات نے اس منصوبہ کا اسرائیل کے سکیورٹی حکام کانام ظاہر کئے بغیرانکشاف کیا ہے تاہم سرکاری سنسرشپ کی وجہ سے اس مبینہ سازش کی مزید تفصیل بیان نہیں کی گئی.
اسرائیل اس سال فروری میں حزب اللہ کے سنئیر کمانڈرعماد مغنیہ کی دمشق میں ایک کاربم دھماکے میں ہلاکت کے بعد ہائی الرٹ ہے .صہیونی ریاست نے اس حملے کا خیر مقدم کیا تھاتاہم اس کی ذمہ داری قبول کرنے سے انکار کردیا تھا.
حزب اللہ کے رہ نما حسن نصراللہ نے اسرائیل پر حملے کا الزام عاید کیا تھا اوروہ متعددمرتبہ مقتول کمانڈر کی ہلاکت کابدلہ لینے کےعزم کا اظہار کر چکے ہیں.
گذشتہ ماہ اسرائیل نے بیرون ملک رہنے اور سفر کرنے والے اپنے شہریوں کو حزب اللہ کے کسی حملے یا اغوا کی کارروائی سے بچنے کے لئے غیر معمولی احتیاط برتنے کی ہدایت کی تھی.
