امریکی فوجی سربراہ کا دورہ سیاچن پر تبصرہ کرتے ہوئے کل جماعتی حریت کانفرنس کے چیئرمین سید علی گیلانی نے تشویش کا اظہار کرتے کہا کہ اسرائیلی اور امریکی فوجی سربراہوں کی کشمیر آمد سے جبری قبضہ جائز نہیں ہوسکتا انہوں نے امید ظاہر کی کہ ریاستی عوام دنیا کی بڑی سے بڑی فوجی طاقتوں سے کوئی خوف کھائے بغیر حالیہ عوامی انقلاب کے ساتھ اپنی تحریکی اور جذباتی وابستگی کو برقرار رکھیں گے-
نئی دہلی کے ہسپتال میں بستر علالت سے ٹیلی فون پر بات کرتے ہوئے سید علی گیلانی نے امریکہ کے فوجی جنرل کے دورہ کشمیر سے پیداشدہ صورتحال پراپنی تشویش سے عوام کو آگاہی دیتے ہوئے کہا کہ جموں وکشمیرکا محل وقوع،قدرتی حسن اوروسائل کی فراوانی کے علاوہ یہاں کے غیور باشندوں کا مذہبی مزاج،امن پسندی اور مہمان نوازی دنیا بھر میں اپنی مثال آپ ہے-
ان کا کہنا تھا کہ دنیا میں جہاں کہیں بھی غاصب اور استعماری حکمرانوں نے عام لوگوں پر ظلم وجبر اور قتل وغارت گری کی وحشیانہ کارروائیاں روارکھیں جموں وکشمیر کے لوگوں نے ان سفاکانہ کارروائیوں کے خلاف اپنی صدائے احتجاج بلند کرتے ہوئے وقت اپنے سینوں پر گولیاں کھانے سے بھی دریغ نہیں کیا-
