اسرائیل کے ساتھ گیس کے ایک مشترکہ معاہدے پر اردن میں سیاسی جماعتوں اور سول سوسائٹی کی طرف سے احتجاج کا سلسلہ جاری ہے۔ گذشتہ روز عمان میں سیکڑوں شہروں نے صہیونی ریاست کے ساتھ گیس معاہدے کے خلاف بہ طور احتجاج انسانی ہاتھوں کی زنجیر بنا کر احتجاج ریکارڈ کرایا۔
مرکزاطلاعات فلسطین کے مطابق عمان میں ہونے والے عظیم الشان احتجاجی مظاہرے کے شرکاء نے ہاتھوں میں بینرز اور کتبے بھی اٹھا رکھے تھے جن پر صہیونی ریاست کے ساتھ طے پائے گیس معاہدے کی فوری منسوخی کے مطالبات درج تھے۔
احتجاج کرنے والے شہریوں کا کہنا تھا کہ اردنی عوام کو امریکی آئل اینڈ گیس کمپنی ’نوبیل‘ کے ذریعے اردن کے قومی وسائل اسرائیل کو فروخت کرنے پرسخت غم وغصہ ہے اور عوام اپنے قومی وسائل کو صہیونیوں کے ہاتھ فروخت کرنے کے خلاف ہیں۔ ہمارا مطالبہ ہے کہ حکومت اسرائیل کے ساتھ مشترکہ گیس کی ڈیل منسوخ کرتے ہوئے قومی وسائل کو ایک دشمن ملک کو فروخت نہ کرے۔
خیال رہے کہ ایک ہفتہ قبل اردن اور اسرائیل نے ایک مشترکہ معاہدہ کیا تھا جس کے تحت اردن کی سمندری حدود میں بحر مردار میں گیس کے ذخائر کے حصول کے لیے مل کرسرمایہ کاری کرنے سے اتفاق کیا گیا تھا۔ گیس کے مشترکہ معاہدے کے لیے امریکا کی نوبل آئل اینڈ گیس کمپنی کو ٹھیکہ دیا جائے گا۔ جب سے اسرائیل اور اردن کے درمیان مشترکہ گیس پروجیکٹ کا اعلان کیا گیا ہے اردن میں عوامی سطح پر احتجاج کا سلسلہ جاری ہے۔
