اسرائیلی وزیردفاع آوی گیڈور لائبرمین نے غزہ کی پٹی میں بار بار کی فوجی جارحیت کو نظرانداز کرتے ہوئے جنگ بندی کی خلاف ورزیوں کا الزام فلسطینی مزاحمت کاروں کے سرتھوپ دیا۔
ایک بیان میں لائبرمین کا کہنا ہے کہ اسرائیلی فوج کو کسی قسم کی مہم جوئی کا شوق نہیں اور نہ ہی فی الحال اسرائیل کا ایسا کوئی ارادہ ہے مگر غزہ کی پٹی میں جنگ بندی کی خلاف ورزیوں کا پوری قوت سےجواب دیا جائے گا۔
اسرائیل کے عبرانی ٹی وی 10 نے اپنی رپورٹ میں بتایا ہے کہ ایک تقریب سےخطاب کرتے ہوئے اسرائیلی وزیردفاع آوی گیڈور لائبرمین نے کہا کہ فوج کسی نئی مہم جوئی کے لیے تیار نہیں اور نہ ہی غزہ کی پٹی میں حماس کے ساتھ کشیدگی بڑھانا چاہتی ہے۔
مگر ساتھ ہی انہوں نے دھمکی آمیز لہجے میں کہا کہ غزہ کی پٹی کی سرحد پر جنگ بندی کی خلاف ورزیوں کا پوری قوت کے ساتھ جواب دیا جائے گا۔ ان کا کہنا تھا کہ ہم دشمن کو زیادہ ڈھیل دینے کے حق میں نہیں۔ جنگ بندی کی خلاف ورزیاں کی گئیں تو فوج اپنی ذمہ داریاں پوری کرے گی۔
لائبرمین کا مزید کہنا تھا کہ غزہ کی طرف سے فائرنگ کا سخت جواب دیا جائے گا۔ غزہ پر حماس کا کنٹترول ہے اور اسے یہ معلوم ہونا چاہیے کہ کسی بھی قسم کی کشیدگی کا نتیجہ کیا ہوسکتا ہے۔
اسرائیلی وزیردفاع کی طرف سے یہ الزام ایک ایسے وقت میں فلسطینی مزاحمت کاروں کے سرتھوپا گیا ہے جب حال ہی میں قابض صہیونی فورسز نے غزہ کی پٹی پر متعدد مقامات پر فضائی حملے کرکے کئی مکانات تباہ کردیے تھے۔
