صہیونی ریاست نے فلسطینی آبادی کو زہر دے کر قتل کرنے کا ایک نیا اور انتہائی خطرناک حربہ اختیار کیا ہے۔ مقامی فلسطینی ذرائع ابلاغ نے انکشاف کیا ہے کہ مقبوضہ مغربی کنارے کے شہر جنین میں اسرائیلی فوج کے طیاروں کی طرف سے چاکلیٹ کی شکل کی زہریلی مٹھائیاں گرائی گئی ہیں۔ خدشہ ہے کہ مشکوک قسم کی مٹھائی کھانے سے شہری خطرناک بیماریوں کا شکار ہوسکتے ہیں۔
مقامی ذرائع نے مرکزاطلاعات فلسطین کو بتایا کہ غرب اردن کے شمالی شہر جنین میں جبع قصبے میں اسرائیلی فوجی طیاروں کی مدد سے بڑی تعداد میں چاکلیٹ کی شکل کی مٹھائیوں کے پیکٹ گرائے گئے۔
مقامی فلسطینی شہریوں نے مساجد میں اعلانات کرکے آبادی کو مشکوک مٹھائیوں کو اٹھانے اور انہیں کھانے سے اجتناب کرنے کی ہدایت کی ہے۔
ذرائع کے مطابق اسی طرح کی مشکوک زہریلی مٹھائیاں اور چاکلیٹس جبع اور الفوارۃ کے مقام سے بھی گھروں کے اطراف پڑی ملی ہیں۔ مشکوک مٹھائیوں کا تجزیہ کرنے کے بعد پتا چلا ہے کہ انہیں اسرائیلی فوج کی طرف سے فلسطینی آبادی کو بیماریوں میں مبتلا کرنے کے لیے پھینکا گیا ہے۔ سماجی بہبود کے اداروں نے فلسطینی شہریوں پر زور دیا ہے کہ وہ اپنے بچوں کو گری پڑی مٹھائی اٹھانے اور اسے کھانے سے سختی سے منع کریں کیونکہ اسرائیلی فوج کی طرف سے پھینکی گئی زہریلی مٹھائی کھانے سے کچھ بھی ہوسکتا ہے۔
