چین میں کی گئی ایک تحقیق میں بتایا گیا ہے کہ چائے اور سیگریٹ نوشی کا شغل ایک ساتھ کرنے والے افراد کو معدے کے کینسر کے زیادہ خطرات لاحق ہوتےہیں۔
مرکزاطلاعات فلسطین کے مطابق چینی ماہرین کا کہنا ہے کہ گرما گرم چائے اور اس کے ساتھ سگریٹ نوشی سے یا شراب کے عادی افراد کے معدے کی نالی میں کینسر کےزیادہ خطرات ہوسکتے ہیں۔
چینی سائنسدانوں کی تیار کردہ تحقیق سائنسی جریدے ’ Annals of Internal Medicine‘ میں شائع کی گئی ہے۔ اس تحقیق میں کہا گیا ہے کہ اگر شراب نوشی کرنے والا یا سگریٹ نوشی کرنے والا شخص تیز گرم چائے پیتا ہے تو اسے کینسر کے خطرات پانچ گنا بڑھ جاتے ہیں۔
ماہرین کا کہنا ہے کہ معدے کے کینسر کا تمباکو نوشی اور گرم چائے کے ساتھ گہرا تعلق ہے۔
ماہرین نے تحقیق کے دوران 4 لاکھ 56 ہزار افراد کی روز مرہ زندگی کا مطالعہ کیا۔ ان میں30 سے70 سال کی عمر کے افراد بھی شامل تھے۔ نو یا ساڑھے نو سال تک گرم چائے اور تمباکو نوشی کرنے والے افراد میں کینسر کے زیادہ خطرات پائے گئے۔
