فلسطین کے مقبوضہ مغربی کنارے اور بیت المقدس میں بدھ کے روز اسرائیلی فوج کی گھر گھر تلاشی کی کارروائیوں میں 15 فلسطینیوں کو حراست میں لینے کےبعد نامعلوم مقام پر منتقل کردیا گیا۔
مرکزاطلاعات فلسطین کے مطابق گذشتہ روز اسرائیلی فوجیوں اور پولیس نے غرب اردن اور بیت المقدس میں فلسطینیوں کے گھروں پر چھاپے مارے اور تلاشی کی آڑ میں گھروں میں لوٹ مار اور توڑپھوڑ کی گئی۔
صہیونی فوج کی طرف سے جاری کردہ بیان میں اعتراف کیاگیا ہے کہ بدھ کے روز پندرہ فلسطینیوں کو گرفتار کیا گیا۔ ان میں سے بعض فلسطینی اسرائیلی فوج اور یہودی آباد کاروں پر حملوں اور مزاحمتی کارروائیوں میں بھی ملوث تھے۔
"قدس پریس” کے نامہ نگار کے مطابق غرب اردن کے شمالی شہر قلقیلیہ میں کفر سابا، رام اللہ میں صفا اور بیت لحم میں حوسان اور الخضر قصبوں میں چھاپے مارے گئے۔ قابض فوج نے چھاپوں میں متعدد فلسطینیوں کو حراست میں لے لیا گیا۔
ادھر بیت المقدس میں العیسویہ اور شعفاط پناہ گزین کیمپ میں اسرائیلی فوج کی تلاشی کی کارروائیوں میں 7 فلسطینیوں کو حراست میں لیا گیا۔
