قابض صہیونی حکام نے فلسطین کے مقبوضہ مغربی کنارے کے جنوبی شہر الخلیل میں یہودی آباد کاروں کو وسیع پیمانے پر مکانات اور دیگر تعمیرات کی اجازت دے دی ہے۔
مرکزاطلاعات فلسطین کے مطابق یہودی آباد کاروں کو الخلیل میں الحسبہ کی سبزی منڈی میں کیثرالمنزلہ مکانات کی تعمیر کی اجازت دی ہے۔
عبرانی ریڈیو کی رپورٹ میں بتایا گیا ہے کہ اسرائیلی وزیر دفاع آوی گیڈور لائبرمین نے قیام اسرائیل سے قبل ملکیت جتلاتے ہوئے یہودیوں کو گھروں کی تعمیر کی اجازت دے دی ہے۔
اسرائیلی ریڈیو کے مطابق مشیر قانون ایٹائے اوفیر نے 20 سال سے تعطل کا شکار تعمیراتی منصوبے پرکام شروع کرنے کی اجازت دی ہے۔ اس منصوبے کی منظوری حال ہی میں حکومتی مشیر کی جانب سے دی گئی تھی۔
عبرانی نیوز ویب سائیٹ "سیروگیم” کے مطابق حکومت نے الخلیل میں یہودیوں کو 31 گھروں کی تعمیر کی اجازت دی ہے۔ ان مکانات کی تعمیر پر 21 اعشاریہ چھ ملین شیکل کی رقم کا تخمینہ لگایا گیا ہے۔
