فلسطین کے علاقے غزہ کی پٹی پر اسرائیلی فوج کے تازہ حملوں کے بعد فلسطین کے دوسرے شہروں میں اسرائیلی ریاستی دہشت گردی کے خلاف اور غزہ کے عوام کے ساتھ اظہار یکجہتی کے لیے مظاہرے جاری ہیں۔
مرکز اطلاعات فلسطین کے مطابق کل منگل کو مقبوضہ بیت المقدس میں العیساویہ کے مقام پر سیکڑوں فلسطینیوں نے اہالیان غزہ کی حمایت اور اسرائیلی ریاستی دہشت گردی کے خلاف بھرپور احتجاجی ریلی نکالی۔ اس موقع پر اسرائیلی فوج اور پولیس نے فلسطینی مظاہرین کو منتشر کرنے کے لیے ان کے خلاف طاقت کا استعمال کیا جس کے نتیجے میں متعدد فلسطینی زخمی بھی ہوئے۔
اسرائیلی فوج نے غزہ کے شہریوں کی حمایت میں ریلی نکالنے کی پاداش میں متعدد فلسطینیوں کو حراست میں بھی لے لیا۔ ان کی شناخت جمیل العباسی، جہاد قوس، محمود المونس اور روحی کلغاصی کے ناموں سے کی گئی ہے۔
خیال رہے کہ اسرائیلی فوج کی طرف سے غزہ کی پٹی پر اتوار کے روز سے جاری حملوں میں ایک درجن فلسطینی شہید اور متعدد زخمی ہوگئے ہیں۔
