فلسطین کے علاقے غزہ کی پٹی میں ماہی گیروں کا کہنا ہے کہ اسرائیلی حکام نے بغیر کسی وجہ کے انہیںسمندر میں مچھلیوں کے شکار لیے شکارگاہ محدود کردی ہے۔
غزہ میں ماہی گیر یونین کی طرف سے جاری کردہ ایک بیان میں کہا گیا ہے کہ صہیونی فوج نے بغیر کسی وجہ کے سمندر میں مچھلیوں کا شکار کرنے والے ماہی گیروں کی کشتیوں پر مشین گنوں سے فائرنگ کی اور انہیں سمندر میں چھ ناٹیکل میل سے آگے جانے سے روک دیا۔
ماہی گیر یونین کے عہدیدار زکریا بکرنے بتایا کہ صہیونی حکام نے انہیں بتایا ہےکہ شام سات بجے کےبعد سے فلسطینی ماہی گیروں کو سمندر میں چھ ناٹیکل میل سے آگے جانے کی اجازت نہیں دی جائے گی۔
خیال رہے کہ اسرائیلی فوج نے چار جون کو فلسطینی ماہی گیروں کو 10 ناٹیکل میل سے 15 ناٹیکل میل تک مچھلیوں کے شکار کی اجازت دی تھی۔
فلسطینی ذرائع ابلاغ کے مطابق صہیونی فوج نے مئی میں 32 مرتبہ فلسطینی ماہی گیروں پر فائرنگ کی جس کے نتیجے میں متعدد فلسطینی ماہی گیر زخمی ہوئے۔ 5 ماہی گیروں کو حراست میں لیا گیا اور ان کی کشتیاں ضبط کی گئیں۔
