اسرائیلی ریاست کے نسل پرستانہ جبر کے نتیجے میں ایک اور فلسطینی اپنا گھر مسمار کرنے پر مجبور ہو گیا۔
مرکز اطلاعات فلسطین کے مطابق کفر قرع کے رہائشی خالد مصالحہ نے اپنا مکان خود ہی مسمار کردیا۔ اسرائیلی حکام کی طرف سے اسے تنبیہ کی گئی تھی وہ اپنا مکان مسمار کرے ورنہ مسماری پرآنے والی لاگت کے عوض اس سے ہزاروں شیکل رقم وصول کی جائے گی۔
یہ مکان مقبوضہ فلسطین کے علاقے کفر قرع میں خلۃ الشلحہ کالونی میں واقع ہے۔ اس مکان کے مالک نے قابض صہیونی حکام کے جرمانے سے بچنے کے لئے اپنے گھر کے خلاف انہدام کے حکم کے بعد یہ قدم اٹھایا۔
خیال رہے کہ یہ پہلا موقع نہیں جب کسی فلسطینی شہری نے اپنا مکان خود مسمار کیا ہے۔ اس طرح کے واقعات اب روز کا معمول بن چکے ہیں۔
