فلسطینی اتھارٹی کے ماتحت سیکیورٹی اداروں کے اہلکاروں نے گذشتہ روز غرب اردن میں اسرائیلی جیل سے رہائی پانے والے ایک فلسطینی کے استقبال کے لیے لگائے گئے کیمپ پر دھاوا بول دیا اور کیمپ میں جمع ہونے والے شہریوں پر لاٹھی چارج اور آنسوگیس کی شیلنگ کی جس کے نتیجے میں متعدد شہری زخمی ہوگئے۔
مقامی ذرائع نے مرکزاطلاعات فلسطین کو بتایا کہ عباس ملیشیا نے غرب اردن کے شمالی شہر طولکرم سے تعلق رکھنے والے سابق اسیر محمد الفاخوری کی رہائی کی خوشی میں استقبالیہ کیمپ پر دھاوا بولا اور کیمپ میں موجود شہریوں پر تشدد کیا۔
عباس ملیشیا نے صہیونی ریاستی دہشت گردی کی راہ پرچلتے ہوئے بہتے فلسطینی بچوں اور خواتین پر حملہ کردیا۔
شہریوں کی طرف سے عباس ملیشیا کے اس اقدام کو غیرذمہ دارانہ اور قوم دشمنی کی پالیسی کا عکاس قرار دیا ہے۔ سوشل میڈیا پر شہریوں نے عباس ملیشیا کو کڑی تنقید کا نشانہ بناتے ہوئے کہا ہے کہ عباس ملیشیا کے اور رام اللہ اتھارٹی کے نزدیک اسرائیلی دشمن کی قید سے رہائی پانےوالے فلسطینیوں کااستقبال کرنا بھی جرم بن چکا ہے۔
