اسرائیلی ذرائع ابلاغ کے مطابق فلسطین کے دریائے اردن کے مغربی کنارے میں رام اللہ کے جنوب میں واقع’عوفر’ جیل میں قید ایک فلسطینی نے صہیونی جیلر پر حملہ کرکے اسے زخمی کردیا۔
اسرائیل کی عبرانی نیوز ویب سائٹ ‘واللا’ کے مطابق عوفر جیل میں قید فلسطینی نے ایک اہلکار پرحملہ کرکے اسے زخمی کردیا۔ جیلر کی گردن پر گہرا زخم آیا ہے جسے علاج کے لیے فوری طورپر اسپتال منتقل کردیا گیا۔
عبرانی ویب سائٹ’0404′ کے مطابق عوفرجیل میں جیلر پر فلسطینی قیدی نے اس وقت حملہ کیا جب دونوں میں کسی بات پرتکرار ہوئی اور جیلر نے فلسطینی قیدی کو غلیظ گالیاں دیں۔ اس پر مشتعل قیدی نے صہیونی جیلر کو دبوچ لیا۔
عبرانی ویب سائٹ کے مطابق اسرائیلی جیل اہلکار پرحملہ کرنے والے فلسطینی قیدی کی شناخت ظاہر نہیں کی گئی ہے۔
خیال رہے کہ اسرائیلی زندانوں میں 7 ہزار کے قریب فلسطینی پابند سلاسل ہیں۔ یہ فلسطینی اسرائیل کی 22 جیلوں میں قید ہیں۔
