فلسطینی اسیران اسٹڈی سینٹر کی طرف سے جاری کردہ ایک بیان میں کہا کہ رواں سال کی پہلی شش ماہی کے دوران اسرائیلی فوج کے ہاتھوں 69 فلسطینی خواتین کو گرفتار کرکے پابند سلاسل کیا گیا۔
مرکزاطلاعات فلسطین کے مطابق فلسطینی اسیران اسٹڈی سینٹر کے ترجمان ریاض الاشقر نے کہا کہ فلسطینی خواتین کی گرفتاریوں اور انہیں زندانوں میں قید کیے جانے کا سلسلہ جاری ہے۔ اسرائیلی فوج کی جانب سے ہرعمر کی خواتین کو حراست میں لیا جاتا رہا ہے۔ عمر رسیدہ، بچیوں، مریض اور زخمی خواتین کو حراست میں لیا جاتا رہا۔
ریاض الاشقر کا کہنا تھا کہ اس وقت بھی اسرائیلی زندانوں میں 41 خواتین پابند سلاسل ہیں۔ ان میں سے بیشتر خواتین بدنام زمانہ دامون جیل میں قید ہیں۔
ریاض الاشقر نے کہا کہ ان میں سے 25 خواتین کو باقاعدہ قید کی سزائوں کا سامنا ہے۔ ان میں سے 8 کو دس سال سے زاید قید کی سزائوں کا سامنا ہے۔
