اسرائیل کے توانائی کے وزیر یووال شنائنٹز نے ڈھٹائی کا مظاہرہ کرتےہوئے کہا ہے کہ فلسطین کے دریائے اردن کے مغربی کنارے کو اسرائیل میں شامل کرنے کا پروگرام مرحلہ وار طریقے سے آگے بڑھایا جائے گا اور منصوبے کو ہرصورت میں مکمل کیا جائے گا۔
اخبار یدیعوت احرونوت کے مطابق اسرائیلی وزیر نے کہا کہ غرب اردن پر اسرائیلی خود مختاری یک دم قائم نہیں ہوگی بلکہ اس پر مرحلہ وار عمل ہوگا اور آخر کار ہم اس منصوبے پر عمل درآمد کرلیں گے۔
اسرائیلی وزیر نے مزید کہا کہ امریکا نے وزیراعظم بنجمن نیتن یاھو کو ابتدائی طور پر یقین دلایا ہے کہ واشنگٹن غرب اردن کو اسرائیل میں ضم کرنے کا حامی ہے۔
خیال رہے کہ اسرائیلی حکومت نے چند ماہ قبل غرب اردن کے 30 فی صد علاقے کو یکم جولائی سے اپنی خود مختاری میں لانے کا اعلان کیا تھا۔ تاہم بعد ازاں صہیونی حکومت نے کہا تھا کہ وہ اس حوالے سے ابھی مزید مشاورت کرے گی۔
