فلسطین – مرکز اطلاعات فلسطین
پاپولر فرنٹ فار دی لبریشن آف فلسطین نے قابض اسرائیل ،اس کی فاشسٹ حکومت کے سربراہ بنجمن نیتن یاھو اور سکیورٹی وزیر ایتمار بین گویر کو تنظیم کے سیکریٹری جنرل احمد سعدات کی زندگی کے لیے مکمل طور پر ذمہ دار قرار دیا ہے۔ فرنٹ کا کہنا ہے کہ احمد سعدات کو مجد جیل میں انتہائی خطرناک طبی و انسانی حالات میں تنہا قید رکھا گیا ہے اور حالیہ منتقلی کے دوران ان پر شدید تشدد اور بدسلوکی کی گئی۔
تنظیم نے ایک بیان میں کہا کہ یہ حملہ ایک منظم اور سوچے سمجھے منصوبے کا حصہ ہے جس کا مقصد اسیرانِ فلسطین، بالخصوص ان کے قائدین کو جسمانی اور ذہنی طور پر ختم کرنا ہے۔ اس میں دانستہ طبی غفلت، اذیت، تنہائی، اور بھوکا رکھنا شامل ہیں۔
فرنٹ نے اس بات پر بھی تشویش ظاہر کی کہ یہ مہم صرف احمد سعدات تک محدود نہیں بلکہ تنظیم کے سیاسی بیورو کے رکن اور جیلوں کے نگران عاہد ابو غلمی کو بھی سخت حالات میں جلبوع جیل منتقل کیا گیا ہے، جہاں وہ اور دیگر ممتاز فلسطینی اسیران جیسے حسن سلامہ، عبد اللہ البرغوثی اور ابراہیم حامد بدترین سلوک اور تشدد کا سامنا کر رہے ہیں۔
پاپولر فرنٹ نے فلسطینی عوام، جلاوطن برادری، عالمی آزاد ضمیر رکھنے والے افراد اور انسانی حقوق کی تنظیموں سے اپیل کی ہے کہ وہ فوری حرکت میں آئیں اور اسیران کے حق میں مؤثر مہم شروع کریں، تاکہ قابض اسرائیل کے جرائم کو عالمی سطح پر بے نقاب کیا جا سکے اور قیدیوں کی جانیں بچائی جا سکیں۔
فرنٹ نے خبردار کیا کہ حالیہ ہفتوں میں اسرائیلی جیل انتظامیہ کی جانب سے فلسطینی قیدیوں، بالخصوص قیادت کے خلاف جارحانہ اقدامات میں غیر معمولی شدت آئی ہے، جو ایک سنگین انسانی بحران کو جنم دے سکتی ہے۔
