غزہ – مرکزاطلاعات فلسطین
اقوام متحدہ کی ریلیف اینڈ ورکس ایجنسی برائے فلسطینی پناہ گزین (یو این آر ڈبلیو اے) نے کہا ہے کہ غزہ کی پٹی میں ادویات اور طبی سامان کی شدید قلت مریضوں کی زندگیوں کے لیے سنگین خطرہ ہے۔
’یو این آر ڈبلیو اے‘ نے بدھ کے روز ایک بیان میں کہا کہ غزہ میں صحت کی دیکھ بھال کا پورا نظام جارحیت کے آغاز سے ہی حملوں کی زد میں ہے۔ اس نے غزہ پر قابض اسرائیلی فوج کی طرف سے مسلط کردہ ظالمانہ ناکہ بندی کو ختم کرنے اور جنگ بندی کی تجدید کا مطالبہ کیا۔
انہوں نے کہا کہ "ہم جو کر سکتے ہیں وہ کر رہے ہیں، لیکن ادویات، درد کش ادویات اور دیگر ضروری طبی سامان کی شدید قلت ہمارے مریضوں کی زندگیوں کے لیے سنگین خطرہ ہے”۔
اسی تناظر میں ڈاکٹرز ودآؤٹ بارڈرز نے بدھ کو شائع ہونے والی ایک رپورٹ میں کہا ہے کہ غزہ کی پٹی فلسطینیوں اور ان کی مدد کرنے والوں کے لیے اجتماعی قبر بن چکی ہے۔
انہوں نے کہا کہ”دنیا کو اب مداخلت کرنی چاہیے۔ یہ ایک نازک لمحہ ہے، نہ صرف غزہ کے بارے میں بلکہ پوری انسانیت کی قسمت کے بارے میں”۔
تنظیم نے مزید کہا کہ ضروری امداد کو جان بوجھ کر روکنا ایک بار پھر منظم طریقے سے فلسطینیوں کی زندگیوں کو تباہ کر رہا ہے، غزہ کی ناکہ بندی کو فوری طور پر ہٹانے، فلسطینیوں اور انسانی اور طبی کارکنوں کی جانوں کے تحفظ اور جنگ بندی کی بحالی ناگزیر ہے۔
