مقبوضہ بیت المقدس – مرکزاطلاعات فلسطین
قابض اسرائیلی حکام نے پیر کی سہ پہر غزہ کی پٹی سے 10 فلسطینی قیدیوں کو رہا کیا۔ رہا ہونے والے قیدیوں کی صحت انتہائی تشویشناک ہے اور انہیں کئی ماہ کی حراست کے دوران تشدد اور منظم بھوک اور پیاس کا نشانہ بنایا گیا۔
فلسطین انفارمیشن آفس نے ٹیلی گرام پر ایک پوسٹ میں اطلاع دی ہے کہ 10 قیدی اسرائیلی جیلوں میں ہونے والے اذیتوں کی وجہ سے خراب صحت کی حالت میں غزہ کی پٹی کے وسطی علاقے دیر البلح میں واقع شہدائےالاقصیٰ ہسپتال پہنچائے گئے ہیں۔
دفتر نے بتایا کہ رہا کیے گئے قیدیوں کو قابض فوج نے تقریباً چھ ماہ قبل شمالی غزہ کی پٹی میں جبالیہ کیمپ کے محاصرے کے دوران گرفتار کیا تھا۔
مقامی میڈیا ذرائع نے اطلاع دی ہے کہ قیدیوں کو خان یونس کے مشرق میں حفاظتی باڑ کے کسسفیم گیٹ کے ذریعے رہا کیا گیا اور انہیں ریڈ کراس کی گاڑیوں کے ذریعے شدائے الاقصیٰ ہسپتال منتقل کیا گیا۔ انہوں نے نشاندہی کی کہ طبی ٹیمیں ان قیدیوں کے ضروری معائنے کر رہی ہیں۔
گذشتہ جمعرات کو قابض فوج نے غزہ کے مختلف علاقوں سے 80 فلسطینی قیدیوں کو ایک حیران کن اقدام میں، مشکل صحت اور نفسیاتی حالات میں رہا کیا۔
قابض حکام نے اس سے قبل غزہ کی پٹی میں گرفتار کیے گئے سیکڑوں قیدیوں کو غزہ جنگ بندی اور قیدیوں کے تبادلے کے معاہدے کے پہلے مرحلے کے حصے کے طور پر رہا کیا تھا۔
