طولکرم میں اسرائیلی جاسوسی طیارے کا میزائل حملہ، پانچ شہید

مقبوضہ غرب اردن کے شہر طولکرم میں ہفتے کے روز اسرائیلی فضائیہ کی بمباری کے نتیجے میں پانچ فلسطینی شہید ہو گئے۔

عینی شاہدین نے بتایا کہ قابض اسرائیل فورس نے شمالی طولکرم کے علاقے عتيل اور زيتا کو ملانے والی شاہراہ پر ایک کار کو نشانہ بنایا، جس میں سوار پانچوں افراد شہید ہو گئے۔

طولکرم میں ثابت گورنمنٹ ہسپتال کے ڈاکٹر امين خضر نے بتایا کہ پانچ شہدا میں صرف ایک شخص کی شناخت ممکن ہو سکی ہے۔ شناخت کئے جانے شخص کا نام ھیثم نور الدین بلیدی بتایا جاتا ہے، ان کی عمر 25 سال بتائی جاتی ہے اور وہ طولکرم کے رہائشی ہیں۔

بمباری کا نشانہ بننے والے دوسرے چار افراد کے جسم بری طرح جل جانے کی وجہ سے ان کی شناخت ممکن نہیں ہو سکی، ان کے جسموں کے ٹکڑے ثابت گورنمنٹ ہسپتال میں امانتا رکھوا دیے گئے ہیں۔ گاڑی کو بغیر بائیلٹ جاسوسی طیارے سے میزائل فائر کر کے نشانہ بنایا گیا۔

بمباری کے بعد اسرائیلی فوج نے علاقے میں ہلہ بول دیا اور جائے وقوعہ کو عام لوگوں کی رسائی کے لئے بند کر دیا جس کی وجہ سے شہری دفاع کے عملے اور رہائشیوں کو کار کے قریب آ کر اس میں لگی آگ بجھانے میں دقت کا سامنا کرنا پڑا۔

تاہم ہسپتال انتظامیہ اور طبی عملہ نعشوں کو ہسپتال منتقل کرنے میں کامیاب رہا۔

بعد ازاں جلد ہی قابض اسرائیلی فوج نے طولکرم شہر کے مغربی علاقے پر چڑھائی کرتے ہوئے جوڈیشل کمپلیکس اور مسجد المرابطین کے اردگرد موجود شہری مکانات اور سرکاری عمارتوں کو بلڈوز کرنا شروع کر دیا۔

اسرائیلی کارروائی میں شہید ہونے والے فلسطینیوں کے ساتھ یکجہتی کے لیے طولکرم صوبے میں ایک روزہ ہڑتال کا اعلان کر دیا گیا ہے۔