حماس سربراہ اسماعیل ہنیہ کے زیر قیادت ایک اعلی سطح کے وفد نے اقوام متحدہ کے مشرق وسطٰیٰ کے لیے خصوصی کوآرڈی نیٹر ٹور وینسلینڈ سے ملاقات کی ہے، یو این کوآرڈی نیٹر کے ساتھ ان کی ٹیم کے معاونین بھی موجود تھے۔
فریقین نے اسرائیل میں انتہائی دائیں بازو کی نئی حکومت بننے کے بعد کی صورت حال پر تبادلہ خیال کیا۔ نئی اسرائیلی حکومت کے فلسطینیوں کے خلاف اب تک کی جارحانہ پالیسی اور منصوبہ بندی کے علاوہ بین گویر کی مسجد اقصیٰ کے حوالے سے کی گئی اشتعال انگیزی بھی زیر بحث آئی۔
اس موقع پر حماس چئیرمین نے نئی انتہائی دائیں بازو کی اسرائیلی حکومت کے بعد فلسطینیوں کے لیے بڑھ جانے والے مسائل اور چیلنجوں کا بھی ذکر کیا۔
انہوں نے اسرائیلی کی نوآبادیاتی طرز کی ناجائز یہودی بستیوں کی تعمیرات کے بارے میں اسرائیلی حکومت کی پالیسی کا بھی حوالہ دیا کہ یہ سب کچھ بین الاقوامی قانون کی خلاف ورزی پر مبنی ہے۔
اسماعیل ہنیہ نے غزہ کے مسلسل ساڑھے پندرہ سال سے جاری محاصرے کا ذکر کرتے ہوئے کہا اس کے علاوہ فلسطینیوں پر ہر جگہ حملے بڑھ رہے ہیں۔
