الشیخ جراح پر اسرائیلی فوج کی چڑھائی، 31 فلسطینی زخمی

قابض اسرائیلی فوج نے فلسطین کے مقبوضہ بیت المقدس میں الشیخ جراح کے مقام پر فلسطینیوں پر چڑھائی کردی جس کے نتیجے میں کم سے کم 31 فلسطینی زخمی ہوگئے۔

ہلال احمر فلسطین نے ایک بیان میں کہا کہ اس کے امدادی عملے نے اکتیس زخمیوں کو طبی امداد فراہم کی۔

اسرائیلی فوج نے فلسطینی شہریوں پر فائرنگ کی جس کے نتیجے میں چار فلسطینیوں کے سروں میں گولیاں لگیں۔ دھاتی گولیوں کی فائرنگ سے چار فلسطینی زخمی ہوئے جب کہ آنسوگیس کی شیلنگ سےتین فلسطینی زخمی ہوئے۔

ہلال احمر فلسطین نے بتایا کہ زخمی ہونےوالوں میں امدادی عملے کے تین کارکن، دو غیرملکی امدادی کارکن اور دیگر عام شہری شامل ہیں۔

ذرائع کا کہنا ہے کہ قابض اسرائیلی فوج نے طاقت کے ذریعے سالم خاندان کے گھر میں موجود شہریوں کو طاقت کےذریعے باہر نکالا۔ خیال رہے کہ سالم خاندان کا مکان مسمار کرنے کا نوٹی فکیشن جاری کیا گیا ہے۔