القدس اور دیار فلسطین کے مفتی اعظم اور مسجد اقصیٰ کے خطیب الشیخ محمد حسین نے صہیونی ریاست اور امریکا کے اداروں کے القدس میں واقع تاریخی اسلامی قبرستان پرجشن کی تقریب کے انعقاد کے مذموم عزائم کے نتائج پر خبردار کیا ہے۔
اپنے ایک بیان میں الشیخ محمد حسین نے کہا ہے کہ اسرائیلی اور امریکی ادارے مشترکہ طور پر’مامن اللہ‘ قبرستان پرایک جشن کی تقریب منعقد کرنے کی تیاری کررہے ہیں جو مسلمانوں کے تاریخی قبرستان کی کھلم کھلا بے حرمتی تصور کی جائے گی اور اس کے تمام نتائج کا ذمہ دار اسرائیل ہوگا۔
اتوار کے روز اپنے ایک بیان میں الشیخ محمد حسین نے کہا کہ سابق امریکی صدر ڈونلڈ ٹرمپ کے دور کے اسرائیل میں سابق سفیر ڈویڈ فریڈمین اور سابق امریکی وزیر خارجہ مائیک پومپیو اسرائیلی حکام کے ساتھ ایک تقریب منعقد کر رہے ہیں۔ یہ تقریب آج سوموار کے روز منعقد ہو رہی ہے جس میں اسرائیلی عہدیدار بھی شرکت کریں گے۔
فلسطینی عالم دین نے کہاکہ القدس میں موجود مامن اللہ قبرستان شہر میں اسلامی تشخص کی علامت ہے اور وہاں پراسرائیلی اور امریکیوں کی جشن کی تقریب مسلمانوں کے مقدس مقام کی بے حرمتی کا کھلا ثبوت ہے۔ امریکی اور صہیونیوں کی اس سازش سے پوری دنیا میں مسلمانوں کے جذبات مشتعل ہوں گے۔
بیان میں مزید کہا گیا ہے کہ مامن اللہ قبرستان میں مسلمانوں کی کئی مقدس ہستیاں اور بزرگ آسودہ خاک ہیں۔ ان کا کہنا تھا کہ اسرائیلی ریاست پہلے ہی مامن اللہ قبرستان کے ایک حصے پرقبضہ کرچکی ہے جس پر نام نہاد ’رواداری میوزیم‘ کے نام سے ایک عجائب گھر تعمیر کر رکھا ہے۔
