اسرائیلی جیل میں گذشتہ 11ماہ سے انتظامی قید کے تحت پابند سلاسل فلسطینی خاتون قیدی بشریٰ الطویل کو رہا کردیا گیا۔28 سالہ بشریٰ کو قابض فوج نے گیارہ ماہ قبل حراست میں لینے کے بعد بغیر کسی الزام کےانتظامی قید میں ڈال دیا تھا۔
خیال رہے کہ انتظامی قید کی پالیسی کے تحت کسی فلسطینی پر کوئی الزام عاید نہیں کیا جاتا اور قیدی کو عدالت میں بھی پیش نہیں کیا جاتا بلکہ اس ظالمانہ پالیسی کے تحت غیرمعینہ مدت تک قید کیا جاتا ہے۔
بشریٰ الطویل کو دامون جیل سے جنین کے شمال میں قائم جلمہ چوکی پر لایا گیا جہاں سے اسے اس کے خاندان کے حوالے کیا گیا۔
یاد رہے کہ قابض اسرائیلی فوج نے بشریٰ الطویل کو 9 نومبر2020ء کو نابلس کےجنوب میں واقع ان کے گھر سے حراست میں لیا تھا۔ گرفتاری کے بعد بشریٰ کو پہلے چار ماہ قید کی سزا سنائی گئی تھی تاہم اسے بعد ازاں مزید غیرمعینہ مدت کے لیے قید کردیا تھا۔
