اسرائیل کی سالم فوجی عدالت نے زیر حراست فلسطینی صحافی اور الاقصیٰ ٹی وی چینل کے نامہ نگار طارق ابو زید کو10 ماہ قید کی سزا سنائی ہے۔
طارق کا تعلق غرب اردن کے شمالی شہر جنین سے ہے۔ ان کے خلاف کئی ماہ سے جاری مقدمہ کی کارروائی میں غزہ سے نشریات پیش کرنے والے الاقصیٰ ٹی وی چینل کے لیے کام کرنے کا الزام عاید کیا گیا ہے۔
اسیران میڈیا سینٹر کے مطابق اسرائیلی فوجی عدالت نے صحافی طارق ابو زید کو 10 ماہ قید اور 8 ہزار شیکل جرمانہ کی سزا سنائی ہے۔
عدالتی فیصلے کے تحت طارق ابو زید کو آئندہ اتوار 11 جولائی کو رہا کیا جائے گا۔ وہ گذشتہ دس ماہ سے مسلسل پابند سلاسل ہیں۔
قابض فوج نے طارق ابو زید کو یکم اکتوبر 2020ء کو حراست میں لیا تھا۔ اس کے بعد سات بار ان کے خلاف عدالتی ٹرایل کیا گیا۔
گرفتاری کے بعد ابو زید کو بتاح تکفا نامی ایک بدنام زمانہ ٹارچر سیل میں منتقل کیا گیا جہاں اس پر کئی روز تک بد ترین تشدد کیا جاتا رہا۔ وہاں سے اسے الجلمہ حراستی مرکز اور پھر مجد جیل میں منتقل کردیا گیا تھا۔
