قابض صہیونی فوج نے ہفتے کے روز فلسطین کے مقبوضہ مغربی کنارے کے شمالی شہر قلقیلیہ میں کفر قدوم کے مقام پر ایک فلسطینی ریلی پر طاقت کا استعمال کیا جس کے نتیجے میں متعدد فلسطینی زخمی ہوگئے۔
مرکزاطلاعات فلسطین کے مطابق مقبوضہ مغربی کنارے کے شمالی شہر قلقیلیہ میں کفر قدوم کے مقام پر فلسطینیوں نے اسرائیلی غنڈہ گردی کے خلاف مظاہرہ کیا۔ اس موقعے پر قابض فوج نے مظاہرین پر آنسوگیس کی شیلنگ کی اور ان پر دھاتی گولیوں سےحملے کیے جس کے نتیجے میں درجنوں فلسطینی دم گھٹنے سے متاثر ہوئے اور کئی دھاتی گولیاں لگنے سے زخمی ہوگئے۔
ذرایع نے بتایا کہ قابض فوج نے کفر قدوم قصبے پر دھاوا بولا اور فلسطینیوں کی نکالی گئی ریلی پر فائرنگ کی جس کے نتیجے میں متعدد فلسطینی زخمی ہوگئے۔
اس موقعے پر فلسطینی شہریوں کی طرف سے صہیونی فوج اور اس کی گاڑیوں پر سنگ باری کی گئی۔
قبل ازیں جمعہ کے روز بھی اس علاقے میں اسرائیلی فوج نے فلسطینیوں کی نکالی گئی ریلیوں پر حملہ کرکے متعدد فلسطینیوں کو زخمی کردیا تھا۔
