اسلامی جہاد کے سیکرٹری جنرل زیاد النخالہ کی قیادت میں جماعت کے ایک اعلیٰ اختیاراتی وفد نے روس کا دورہ کیا ہے جہاں انہوں نے روسی نائب وزیر خارجہ اور مشرق وسطیٰ کے لیے ماسکو کے مندوب میخائل بوگدانوف سے ملاقات کی ہے۔
مرکزاطلاعات فلسطین کے مطابق اسلامی جہاد کے سیکرٹری جنرل اور روسی نائب وزیر خارجہ کے درمیان ہونے والی ملاقات میں فلسطین کی تازہ صورت حال، فلسطین میں ہونے والے انتخابات اور اسرائیلی ریاست کے مظالم پر بات چیت کی گئی۔
اسلامی جہاد کے وفد نے تفصیل کے ساتھ روسی نائب وزیر خارجہ کو فلسطین کی اندرونی صورت حال اور قابض صہیونی دشمن کے مظالم کے بارے میں آگاہ کیا۔ انہوں نے کہا کہ اسلامی جہاد فلسطینی دھڑون میں مصالحت کی خواہاں ہے۔ انہوں نے فلسطینی قوم کے آئینی حقوق کے حصول کے لیے عالمی اور علاقائی قوتوں کی حمایت پر زور دیا۔
اسلامی جہاد کے رہ نمائوں نے روسی قیادت سے ملاقات میں کہا کہ خطے کا اصل مسئلہ اسرائیلی ریاست کا وجود ہے۔ خطے میں پاییدار امن کے قیام کے لیے قابض صہیونی ریاست کے ہاتھوں غصب کیے گئے حقوق فلسطینی قوم کو دلانا ناگزیر ہے۔
انہوں نے کہا کہ اسلامی جہاد فلسطینی دھڑوں کے درمیان مصالحتی مذاکرات کے حوالے سے کھلے پن کا مظاہرہ کرے گی اور فلسطینی قوم کو قابض دشمن کے خلاف ایک فورم پر لانے کے ویژن پر عمل جاری رکھے گی۔
اس موقعے پر روسی نائب وزیر خارجہ میخائل بوگدانوف نے فلسطینی قوتوں کے درمیان اتحاد اور یکجہتی کی ضرورت پر زور دیا۔ انہوںنے کہا کہ روس فلسطینی قوتوں کو متحد کرنے کے لیے اپنی کوششیں جاری رکھے گا۔
