اسرائیلی جیلوں میں قید فلسطینیوں میں کرونا کی وبا کے پھیلائو میں مزید اضافہ سامنے آیا ہے۔ تازہ اطلاعات کے مطابق اسرائیل کی ‘ریمون’ جیل میں مزید 15 فلسطینی اس وبا کا شکار ہوگئے ہیں۔
اسرائیلی جیلوںمیں قیدیوں کے حقوق پرنظر رکھنے والے ادارے ‘کلب برائے اسیران’ کی طرف سے جاری ایک بیان میں کہا گیا ہے کہ اسرائیل کی ریمون جیل میں مزید 15 فلسطینی قیدی کرونا کا شکار ہوگئے ہیں جس کے بعد رواں جنوری میں اب تک 53 اور گذشتہ ایک سال کےدوران کرونا سے متاثرہ قیدیوںکی تعداد 265 ہوگئی ہے۔
کلب برائے اسیران کے مطابق ‘ریمون’ جیل کے وارڈ ‘2 ‘ اور ‘6’ میں قید فلسطینی شکار ہوئے ہیں جبکہ اس سے قبل جیل کے وارڈ ایک، تین اور 4 میں کرونا کے پانچ اور سات اسیران اس کا شکار ہوئے تھے۔ اس جیل میں قید فلسطینیوں کی کل تعداد 650 ہے۔
کلب برائے اسیران کا کہنا ہے کہ اسرائیلی جیل ریمون کے تمام وارڈز میں قیدیوں کے کرونا ٹیسٹ لیے گئے ہیں۔ اسرائیلی جیل انتظامیہ کی طرف سے جاری بیان میں کہا گیا ہے کہ آج بدھ کے روز قیدیوں کو کرونا ویکسین لگائے جانے کا عمل روک دیا گیا ہے۔
کلب برائے اسیران کے مطابق اسرائیلی جیل حکام قیدیوں کو طبی امداد کی فراہمی میں ٹال مٹول اور دانستہ غفلت کا مظاہرہ کر رہے ہیں۔
خیال رہے کہ اسرائیلی جیلوں میں مجموعی طور پر چھ ہزار سے زاید فلسطینی پابند سلاسل ہیں جن میں پچاس خواتین، تین سو بچے اور سیکڑوں انتظامی قیدی ہیں۔ سات سو سےزاید فلسطینی مختلف دائمی بیماریوں میں مبتلا ہیں مگرانہیں کسی قسم کی طبی معاونت فراہم نہیں کی جاتی۔
