قابض اسرائیلی حکام نے غرب اردن کے جنوبی شہر الخلیل میں مسافر یطا کے مقام پر ایک زیر تعمیر مسجد کو شہید کرنے اور ام قصہ کے مقام پر واقع ایک پرائمری اسکول کو مسمار کرنے کا حکم دیا ہے۔
ایک مقامی سماجی کارکن فواد العمور نے بتایا کہ اسرائیلی حکام کی طرف سے انہیں ایک نوٹس ملا ہے جس میں خربہ ام قصہ کے مقام پر واقع ایک زیر تعمیر مسجد اور اسی علاقے میں قائم ایک پرائمری اسکول کو مسمار کرنے کا حکم دیا ہے۔ ان کا کہنا تھا کہ زیر تعمیر مسجد بدو فلسطینیوں کی ام الدرج سوسائٹی میں شامل ہے اور یہ یطا کے علاقے میں آتی ہے۔
ادھر اسکول کے پرنسپل یوسف البسایطہ نے بتایا کہ ان کے اسکول میں 50 بچے اور بچیاں زیر تعلیم ہیں۔ ان کا کہنا تھا کہ اس قصبے میں یہ واحد اسکول ہے جو صہیونی حکام کے غاصبانہ قبضے کے خلاف مسلسل مزاحمت کر رہا ہے۔ یہ اسکول فلسطینی وزارت تعلیم کی طرف سے کھولا گیا جو ام قصہ، العبادیہ اور السرج کے علاقوں کے بچوں کا واحد پرائمری اسکول ہے۔
