عرب جمہوریہ مصر نے اسرائیلی حکام کی جانب سے مقبوضہ غرب اردن کے علاقے میں یہودی آبادکاروں کے لیے 780 نئے مکانات تعمیر کرنے کے فیصلے کی شدید مذمت کرتے ہوئے اسے بین الاقوامی قانون کی خلاف وزری قرار دیا۔
مصری وزارت خارجہ کے ترجمان سفیر احمد حافظ نے سوموار کے روز اپنے ملک کے موقف کا اعادہ کرتے ہوئے کہا قاہرہ مشرقی القدس سمیت مقبوضہ فلسطینی علاقوں میں یہودی آباد کار منصوبوں کو مسترد کرتے ہوئے انہیں فوری طور پر روکنے کا مطالبہ کرتا ہے۔
مصر کے بقول ایسے اقدامات مسئلہ فلسطین کے دو ریاستی حل کی راہ مسدود کرنے کر کے مترادف ہیں اور ان کے ذریعے امن عمل اور فلسطین اسرائیل مذاکرات کی منزل کھوٹی ہوتی جا رہی ہے۔
