لبنان نے ایک بار پھر اقوام متحدہ میں اسرائیل کے خلاف اپنی فضائی حدود کی خلاف ورزیوں اور خود مختاری کو نقصان پہنچانے پر احتجاج کیا ہے۔
لبنان کی سرکاری نیوز ایجنسی کے مطابق بیروت وزارت خارجہ نے ایک بیان میں کہا ہے کہ صدر میشل عون کی طرف سے اقوام متحدہ کے سیکرٹری جنرل انتونیو گوٹیرس اور سلامتی کونسل کو مکتوب ارسال کیے گئے ہیں جن میں ان کی توجہ اسرائیل کے ہاتھوں لبنان کی خود مختاری کی مسلسل خلاف ورزیوں کی جانب مبذول کرائی گئی ہے۔
وزارت خارجہ کا مزید کہنا ہے کہ اسرائیلی ریاست لبنان کی خود مختاری کی بار بار خلاف ورزیاں کررہی ہے۔ اسرائیلی ریاست کے اقدمات سلامتی کونسل کی قرار داد 1701 کی کھلی خلاف ورزی ہے۔
لبنانی صدر نے اقوام متحدہ سے مطالبہ کیا ہے کہ وہ اسرائیلی ریاست کے ہاتھوں لبنان کی فضائی اور زمینی حدود کی خلاف ورزیوں کا نوٹس لے اور آئندہ کے لیے اسرائیل کو لبنان کی خود مختاری کی پامالیوں سے روکے۔
خیال رہے کہ لبنان اور اسرائیل کے درمیان گذشتہ کچھ عرصے سے کشیدگی جاری ہے۔ لبنان کا کہنا ہے کہ اسرائیل آئے روز اس کی فضائی، بری اور بحری حدود کی خلاف ورزیوں کا ارتکاب کررہا ہے۔
