متحدہ عرب امارات کی جانب سے فلسطین کے محصور علاقے غزہ کی پٹی کے لیے طبی سامان اور ادویات پر مشتمل امدادی قافلہ بھیجا ہے جو گذشتہ روز مصر کے راستے سے رفح کراسنگ عبور کرکے غزہ داخل ہوا۔
مرکزاطلاعات فلسطین کے مطابق امدادی قافلے میں آکسیجن پلانٹ، وینٹی لیٹر، دیگر طبی آلات اور ادویات شامل ہیں۔ یہ امدادی سامان غزہ کی پٹی میں فلسطینی وزارت داخلہ کے حکام کے حوالے کیا گیا۔
فلسطینی رکن پارلیمنٹ اشرف جمعہ نے بتایا کہ متحدہ عرب امارات کی طرف سے ایک ماہ کےدوران غزہ کی پٹی کے لیےیہ اپنی نوعیت کا دوسرا قافلہ ہیں۔
انہوںنے بتایا کہ امارات کی طرف سے فراہم کردہ طبی سامان میں طبی مقاصد کے لیے آکسیجن کی تیاری کا پلانٹ شامل ہے جو موجودہ کرونا کی وبا کے دوران فلسطینیوںکو درپیش مشکلات کے دوران اہم ترین ہے۔ اس سے غزہ کی پٹی میں کرونا مریضوں کے علاج میں مدد ملے گی۔
امارات کی طرف سے فراہم کردہ امدادی طبی سامان اور آکسیجن پلانٹ غزہ کی پٹی میں یورپی اسپتال منتقل کردیا گیا ہے۔ اس آکسیجن پلانٹ سے 25 مریضوں کے لیے آکسیجن کی تیاری میں مدد ملے گی۔
