قابض صہیونی ریاست نے کرونا وبا پھیلنے کے بعد ریمون جیل کو مکمل طور پر سیل کر دیا ہے۔ یہ اقدام اس وقت کیا گیا جب متعدد قیدیوں اور جیلروں کے کرونا کا شکار ہونے کی تصدیق کی گئی تھی۔
کلب برائے اسیران کے مطابق ریمون جیل کو وبا کے مزید پھیلائو کے خدشے کے تحت سیل کیا گیا ہے۔ قیدیوں کو ایک دوسرے سے دور رکھا گیا ہے۔ اس کے علاوہ متعدد قیدیوں کے ٹیسٹ بھی لیے گئے ہیں۔
کلب برائے اسیران کے مطابق اسرائیلی داخلی سلامتی کے وزیر نے ایک نسل پرستانہ بیان میں کہا تھا کہ جیلوں میں قید فلسطینیوں کو کرونا ویکسین نہیں لگائی جائے گی جب کہ یہودی قیدیوں کو ویکسین لگانے کی تیاری کی جا رہی ہے۔
خیال رہے کہ ریمون جیل کے سات وارڈز میں 360 فلسطینی پابند سلاسل ہیں۔ روں سال کرونا کی وبا پھیلنے کے بعد اب تک 140 فلسطینی کرونا کا شکار ہوچکے ہیں۔ مجموعی طور پر اسرائیلی زندانوں میں 4400 فلسطینی قید ہیں جن میں 41 خواتین، 170 بچے اور 380 انتظامی قیدی شامل ہیں۔
