فلسطینی وزارت صحت کی طرف سے جاری کردہ ایک بیان میں بتایا گیا ہے کہ گذشتہ چوبیس گھںٹوں کے دوران فلسطینی علاقوں میں کرونا کے مزید 31 مریض دم توڑ گئے جب کہ 1514 نئے کیسز کی تصدیق کی گئی ہے۔
مرکزاطلاعات فلسطین کے مطابق فلسطینی وزیر صحت می کیلہ کی طرف سے جاری کردہ ایک بیان میں کہا گیا ہے کہ پچھلے 24 گھنٹوں کے دوران فلسطینی علاقوں میں کرونا کے شبے میں 5458 افراد کے ٹیسٹ لیے گئے جن میں سے 1514 کی رپورٹس کے نتائج مثبت سامنے آئے اور ان کے کرونا کا شکار ہونے کی تصدیق کی گئی ہے۔
رپورٹ میں کہا گیا ہے کہ گذشتہ چوبیس گھنٹوں کے دوران فلسطینی علاقوں میں کرونا کے 1848 مریض صحت یاب ہوئے۔ فلسطینی علاقوں میں کرونا سے صحت یاب ہونے کی شرح 81 اعشاریہ 4 فی صد، ایکٹیو کیسز کا تناسب 17 اعشاریہ 7 فی صد اور اموات صفر اعشاریہ نو فی صد ہے۔
گذشتہ چوبیس گھنٹوں کے دوران غزہ کی پٹی میں 11 ، غرب اردن میں 17 مریض دم توڑ گئے۔ فوت ہونے والوں میں نابلس کے 4، طولکرم کے 3، جنین کے 3، بیت لحم کے 3، الخلیل کا ایک اور رام اللہ کے تین مریض شہری شامل ہیں۔
گذشتہ چوبیس گھںٹوں کےدوران نابلس میں 157، طولکرم میں 89، القدس کے نواحی علاقوں میں 61، طوباس میں 30، سلفیت میں 44، جنین میں 144، بیت لحم میں 96، الخلیل میں 171، رام اللہ میں 191، قلقیلیہ میں 23، اریحا میں 16، غزہ کی پٹی میں 280 اور القدس شہرمیں 212 نئے مریض سامنے آئے ہیں۔
