بین الاقوامی علما کونسل نے فلسطینی قوم کے خلاف اسرائیلی ریاست کے مظالم کی مذمت کرتے ہوئے عالمی برادری اور عالم اسلام پر زور دیا ہے کہ وہ قابض صہیونی ریاست کا مقابلہ کرنے کے لیے مربوط اور ٹھوس حکمت عملی اختیار کریں۔
مرکز اطلاعات فلسطین کے مطابق فلسطینی قوم کے ساتھ یکجہتی کے عالمی دن کے موقعے پر اپنے پیغام میں بین الاقوامی علما کونسل کے سیکرٹری جنرل علی القرہ داغی نے کہا کہ فلسطین کی آزادی اور قابض ریاست کے مظالم کا مقابلہ کرنے کے لیے ٹھوس اور مربوط حکمت عملی وضع کرنے کی ضرورت ہے۔
انہوں نے کہا کہ فلسطین اور قضیہ فلسطین اس وقت تاریخ کے نازک دور سے گزر رہا ہے۔ ان مشکل حالات میں عالمی برادری اور عالم اسلام کو فلسطینی قوم کے ہاتھ مضبوط کرنا ہوں گے تاکہ وہ قابض ریاست کے مظالم کا مقابلہ کرسکے۔ انہوں نے کہا کہ عالم اسلام کے لیے فلسطین جیسے حل طلب مسائل کے حل کے لیے فوری اور موثر اقدامات کی فوری ضرورت ہے۔
خیال رہے کہ 29 نومبر کو اقوام متحدہ کی اپیل پر ہر سال فلسطینیوں کے ساتھ یکجہتی کا عالمی دن منایا جاتا ہے۔ اس دن عالمی سطح پر فلسطینی قوم کے حقوق کو تازہ کیا جاتا ہے اور صہیونی ریاست کے جرائم اور مظالم کی روک تھام کے لیے اقدامات پر زور دیا جاتا ہے۔
