فلسطینی علاقوں میں اسرائیلی فوج کی جانب سے فلسطینیوں کے مکانات اور دیگر جائیدادوں کی مسماری اور غاصبانہ قبضے کے خلاف سنہ 1948ء کے مقبوضہ علاقے جزیرہ نما النقب میں ہزاروں فلسطینیوں نے احتجاجی جلوس نکالا۔
مرکز اطلاعات فلسطین کے مطابق سیکڑوں فلسطینیوں نے حورہ گائوں کے داخلی راستے پر جمع ہو کر مکانات مسماری اور غاصبانہ قبضے کے خلاف مظاہرہ کیا اور اسرائیل سے مسماری کی کارروائیاں اور قبضے کا سلسلہ بند کرنے کا مطالبہ کیا۔
مظاہرین نے ہاتھوں میں بینرز اور کتبے اٹھا رکھے تھے جن پر گھروں کی مسماری اور فلسطینی املاک اور اراضی پر غاصبانہ قبضے کے خلاف نعرے درج تھے۔
مظاہرین سے خطاب کرتے ہوئے فلسطینی رہ نمائوں نے مکانات کی مسماری کو اسرائیلی ریاست کی کھلم کھلا نسل پرستی اور فلسطینیوں پر زندگی تنگ کرنے کی دانستہ کوشش قرار دیا۔
مظاہرین نے اسرائیلی کنیسٹ کے عرب ارکان سے مطالبہ کیا کہ وہ اندرون فلسطین میں گھروںکی مسماری کی اسرائیلی کارروائیوں پر آواز اٹھائیں اور جزیرہ نما النقب اور دوسرے فلسطینی علاقوں میں اسرائیلی ریاست کے غاصبانہ قبضے کی روک تھام کے لیے کردار ادا کریں۔
